LA MAZURKA SOUTO LI PIN

CHARLOUN

Galànti chatouno,
Amourous jouvént,
La roso, boutouno
Ansin nous counvèn.
Au jour-d'uei qu'es fèsto,
Anen la culi,
Qu'en danso rnoudèsto
Devèn trefouli.

Venès, que l'ouro s'avanço,
Es fèsto au Mas d'escanin ;
La mazurka, gènto danso,
La faren souto li pin.

Venès, que l'ouro s'avanço,
Es fèsto au Mas d'escanin ;
La mazurka, gènto danso,
La faren souto li pin.

Lou bèu musicaire,
Bèn estigança,
Fau que tarde gaire,
Déurié coumença...
Devers lis Aupiho,
Vès lou tambourin :
Acò nous reviho
E nous met en trin.

Venès, que l'ouro s'avanço,...

Coulourido o palo,
Dins l'èr perfuma,
Li man sus l'espalo
Quau pòu nous bleima!...
Dansant en mesuro
Is iue di parènt
Souto la verduro,
Res nous dira rèn.

Venès, que l'ouro s'avanço,...

La font de l'Arcoulo,
Que coulo à grand rai,
L'auro ié ventoulo
Li pibo e li frais ;
Au riéu que clarejo,
En coulour d'argènt,
Ges d'àutris envejo,
Que béure au sourgènt.

Venès, que l'ouro s'avanço,...

Oh! que saren bello,
Dins lou fres valoun,
Largant li trenello
De nòsti péu blound!
En floutant à rèire,
Li jouvènt alor,
Eli creiran vèire
De garbello d'or!

Venès, que l'ouro s'avanço,...

La danso finido,
Vendren à parèu,
Dedins la bastido,
Souto lou castèu ;
En rejouïssènço,
Béuren lou muscat,
Pèr la souvenènço
De la mazurka.

Venès, que l'ouro s'avanço,...